གསལ་བརྡ། ཁྱོན་ཡོངས་ནས་ཐ་མག་མེད་པའི་སློབ་གྲྭ་འཛུགས་སྐྲུན་བྱེད།

       ཕྱིན་ཆད་བུ་བཅོལ་ཁང་དང་སློབ་གྲྭ་ཆུང་འབྲིང་།དེ་བཞིན་འབྲིང་རིམ་ལས་རིགས་ལག་རྩལ་སློབ་གྲྭའི་ཁང་པའི་ནང་ངམ་ཕྱི་ལོགས་གང་ནས་ཀྱང་ཐ་མག་འཐེན་རྒྱུ་བཀག་འདུག མ་ཟད་ཁང་པའི་ནང་དུ་ཚག་ཕོར་སོགས་ཐ་མག་འཐེན་པར་སྤྱོད་པའི་ཅ་ལག་གང་ཡང་བཞག་ཆོག་པ་མ་རེད།

  ཉེ་སྔོན། སློབ་གསོ་པུའུ་ཡིས་རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་དང་མཉམ་འབྲེལ་སྒོས《ཐ་མག་མེད་པའི་སློབ་གྲྭ་འཛུགས་སྐྲུན་བྱེད་པར་སྔར་ལས་ཤུགས་སྣོན་བྱེད་པའི་ཐད་ཀྱི་བརྡ་སྦྱོར》དཔར་འགྲེམས་བྱས་ཤིང་།       2022ལོའི་ལོ་མཇུག་བར་དུ་རིམ་པ་སོ་སོའི་སློབ་གྲྭ་སོ་སོས་ཐ་མག་མེད་པའི་སློབ་གྲྭ་ཁྱོན་ཡོངས་ནས་འཛུགས་སྐྲུན་བྱེད་པའི་དམིགས་འབེན་མངོན་འགྱུར་བྱེད་པར་བརྩོན་ལེན་བྱ་རྒྱུ་རེད།   

 《བདེ་ཐང་ཀྲུང་གོའི་ལས་འགུལ(2019-2030)》ཐ་མག་ཚོད་འཛིན་ལས་འགུལ་ལག་བསྟར་བྱེད་པར་མགྱོགས་མྱུར་སྒོས་སྐུལ་འདེད་བྱ་ཆེད།ཚན་རིག་གི་ཐབས་ལམ་སྤྱད་དེ། སྤྱི་དམངས་ཀྱིས་ཐོག་མར་རང་གི་བདེ་ཐང་ལ་འགན་འཁུར་དགོས་པའི་འདུ་ཤེས་ན་ཆུང་སློབ་མ་ཚོར་གོམས་སུ་བཅུག་སྟེ།སློབ་གྲྭའི་ནང་དུ་ཐ་མག་མེད་པའི་ཁོར་ཡུག་ཅིག་ཁྱོན་ཡོངས་ནས་བསྐྲུན་དགོས་པ་རེད་ལ། ན་ཆུང་བྱིས་པའི“ཐ་མག་རྐང་གཅིག་ཀྱང་མི་འཐེན་པའི”སྤྱི་ཚོགས་ཁོར་ཡུག་ཅིག་བརྟན་པོར་བཟོ་ཆེད།ཐ་མག་མེད་པའི་སློབ་གྲྭའི་འཛུགས་སྐྲུན་བྱེད་པར་སྔར་ལས་ཤུགས་སྣོན་གཏོང་བའི་འབྲེལ་ཡོད་དོན་ཚན་གཤམ་གསལ།

  ཐ་མག་མེད་པའི་སློབ་གྲྭ་བསྐྲུན་རྒྱུ་དེ། བདེ་ཐང་དཔལ་ཡོན་ཅན་གྱི་མི་གསོ་སྐྱོང་བྱེད་པའི་ཁོར་ཡུག་འཛུགས་སྐྲུན་དང་།ན་ཆུང་བྱིས་པའི་ལུས་སེམས་བདེ་ཐང་ལ་སྲུང་སྐྱོབ་བྱེད་པ། ན་ཆུང་བྱིས་པར་ཆུང་དུས་ནས་གོམས་གཤིས་བཟང་པོ་གོམས་རྒྱུར་སྐུལ་འདེད་གཏོང་བ་བཅས་ཀྱི་དོན་སྙིང་གལ་ཆེན་ལྡན།རིམ་པ་སོ་སོའི་འཕྲོད་བསྟེན་བདེ་ཐང་དང་སློབ་གསོ་སྡེ་ཁག་གིས་ཐ་མག་མེད་པའི་སློབ་གྲྭ་འཛུགས་སྐྲུན་བྱེད་པའི་གལ་ཆེའི་རང་བཞིན་དང་དགོས་ངེས་རང་བཞིན་ལ་ངོས་འཛིན་བྱེད་ཚད་སྔར་ལས་མཐོ་རུ་བཏང་སྟེ།ཐ་མག་མེད་པའི་སློབ་གྲྭ་འཛུགས་སྐྲུན་བྱེད་རྒྱུ་དེ་སློབ་གྲྭའི་བསམ་པའི་དཔལ་ཡོན་འཛུགས་སྐྱོང་གི་སྒུལ་ཤུགས་སུ་བརྩི་དགོས་ལ།རྩ་འཛུགས་ཀྱི་འགོ་ཁྲིད་ལ་ཤུགས་སྣོན་བརྒྱབ་སྟེ་་གཅིག་གྱུར་རྩ་འཛུགས་དང་ས་ཁོངས་དོ་དམ་གྱི་རྩ་དོན་གཞིར་བཟུང་སྟེ།ས་ཁོངས་དེའི་ནང་གི་ཐ་མག་མེད་པའི་སློབ་གྲྭ་འཛུགས་སྐྲུན་བྱེད་པའི་བྱ་བའི་སྒྲིག་གཞི་འཐུས་ཚང་དུ་གཏོང་བ།ལག་བསྟར་ཇུས་གཞི་དང་ལོ་འཁོར་གྱི་བྱ་བའི་འཆར་གཞི་སྒྲིག་བཟོ་གཏན་འབེབས་བྱས་ཏེ། ཐ་མག་མེད་པའི་སློབ་གྲྭ་འཛུགས་སྐྲུན་བྱ་བ་ཁྱོན་ཡོངས་ནས་སྤེལ་བར་སྐུལ་འདེད་གཏང་དགོས།2022ལོའི་ལོ་མཇུག་བར་དུ་རིམ་པ་སོ་སོའི་སློབ་གྲྭ་སོ་སོས་ཐ་མག་མེད་པའི་སློབ་གྲྭ་ཁྱོན་ཡོངས་ནས་འཛུགས་སྐྲུན་བྱེད་པའི་དམིགས་འབེན་མངོན་འགྱུར་ཐུབ་པར་བརྩོན་ལེན་བྱ་རྒྱུ་རེད།